ЗА НИЗ ГУДАЙ МУКАФАТ…
Радио «Азадвал» са къуз
Авай ихьтин жузун гуз:
-А мукафат Нобелан
Куьне низ гудай лагь кван?
- За Алла Борисовнадиз!..
-За ам гудай Путиназ!..
-За гудай Мадоннадиз!..
-Зани Растроповичаз!..
ТIварар кьазвай гьа икI чаз,
Зурба ксарин ихьтин,
Куьчейра Москвадин.
Фена рикIяй зи хиял,
Заз ганайтIа а суал,
Жаваб гудай:
-Садазни инсанрикай!
За ам гудай цуьквериз,
Гад-гатфарриз, хъуьтIериз,
Гатун, зулун марфариз,
Руьгь шадардай гафариз,
Шад ятарин шуршурдиз,
Лап дегьруьн гургурдиз,
Лап кьакьан чарчардиз,
Гъетерин пак цIарцIардиз,
Яргъирушан аркадиз,
Хайи чилин хурхадиз,
Яран йикъар атуниз,
Чубарукрин хтуниз,
ЧIигъичIигърин, хъиперин,
КукупIарин, лиферин
Шад манидиз, акунриз,
БицIекарин рахунриз,
Инсанарин пехъи гъил,
Тухар тежер ичIи вил
Агакь тийир маканриз,
Тик рагариз, кьакьанриз,
Шагьварризни гарариз,
Нян чIаван ярариз,
Чими хъвердиз Ракъинин,
Ал нурариз экуьнин,
ТIебиатдин дуьзвилиз,
Секинвилиз, кисвилиз,
Каинатдин генгвилиз,
Яргъалвилиз, ленгвилиз,
Садни,
Чун квачизни дуьнядин
Авайвилиз, хьунвилиз,
ЧIехивилиз, унвилиз,
Чаз уьмуьрар гунвилиз
За мукафат, тIвар гудай,
За мукафат, тIвар гудай…
10.04.2016