Вучиз вун заз кьисмет хьанач, к1аниди?
Зи рик1ин пад, зи вилин хад, азизди!
Пад жезва рик1, кьарай амач, к1аниди,
Къарих я зун, вун я зи яд, азизди!
Вучиз вун заз кьисмет хьанач, к1аниди?
Зун ви винел шагьвар хьтин гар жедай!
Вун зи къвалал хьанайтирт1а, азизди,
Дак1анбуруз и дуьняда дар жедай.
Зи дердинай ирид цавар ишезва,
Лугьузава гъам квай баяд манидив,
Уьмуьрдин рехъ ат1узва хьи, к1ар жезва,
Вучиз вун заз кьисмет хьанач, к1аниди?
Тахсир зид я, кьат1анач за, аман яр,
Ви вилери лугьузвай ц1ай, азизди.
Ашкъидикай са зерре кьван аман , яр,
Вучиз вун заз кьисмет хьанач, к1аниди?
Ч1алах жедач зун дуьнядин крарал,
Вун авачт1а, дуьня таб я, азизди.
Ч1улав цацар экъеч1да зи тек срал,
Вучиз вун заз кьисмет хьанач, к1аниди?