Агъзур багьна жагъуриз вун алахъмир,
Авахьзава ви вилерай тапарар.
Рагъул яд хьиз вун кьуд патаз алахьмир,
Физват1а вач, ийимир заз амалар.
Зи патав вун атанвайтир кан хьана,
Ашкъ уюн хьиз аквазват1а, фад чу хъвач.
Атанвай вун, зи уьмуьрдиз экв гъана
Ви теменрик эвелан хьиз дад кумач.
Агъзур уюн гъана хьи на кьилел зи,
Чуьнуьх гумбат къугъун хьана к1валах ви.
Ягьнат1ариз хъуьрезва вун винел зи,
Кузват1ан зун, хъижезамач ч1алах ви.
Ви рик1е зун авачт1а заз герек туш,
Канда лугьуз - пич1и гафар амукьрай.
Чир хьанач заз, вун зи ашкъдин мелек туш,
Къуй зи винел дердер, гъамар ацукьрай.
Вучда вакай, гьик1 атайт1а гьак1 чухъвач,
Зи рик1 вуна шуьткьуьрна терг авурла.
Дамахар гвай нини я вун, рик1 авач,
Куз хъухъвузва зун тапарар акурла.