Агъзур сефер темен гана за ярдиз,
Анжах рик1и лугьузва хьи, т1имил я.
Чандавай ц1ай, ялав гана за ярдиз,
Анжах рик1и лугьузва хьи, т1имил я.
Гьикьван вахт я зун ашкъидал алугна,
Ярдин винел цавай гъетер авудна
Алахьна за рик1ин ц1аяр агудна,
Анжах рик1и лугьузва хьи, т1имил я.
Хвена рик1е хъуьт1узни ам гатфар хьиз,
Элкъвена зун адан кьилел шагьвар хьиз,
Гьижрандин шел авахьна зал марфар хьиз,
Анжах рик1и лугьузва хьи, т1имил я.
Адан мич1ер эквер ийиз алахъна,
Адан дердер шекер ийиз алахъна,
Адан гелел гелер ийиз алахъна,
Анжах рик1и лугьузва хьи, т1имил я.
Эй Шагьмардан, ч1угуг на гъам гьижрандин,
Гьикьван азаб эхайт1ани виждандин,
Акьурт1ана чанда хенжел деврандин,
Анжах рик1и лугьузва хьи, т1имил я.