Дуьньядин чарх элкъуьрайбур чун туш, чун,
Акъвазризни я ам чалай алакьдач.
Цава гъетер куькIуьрайбур чун туш, чун,
Хкадризни абур чалай алакьдач.
Бес вучиз чун и са цавун кIаник кваз,
Садаз масад душманар хьиз аквазва?
Гьар са кIвале, гьар са къавун кIаник кваз,
Эвер тавур мугьманар хьиз аквазва?
И кардин сир сад я - чаз чун кIан тахьун,
Сада-садаз лагьай гафун ван тахьун!
Чун чахъ галаз хъиле ава лагьана,
Рагъ гьар юкъуз экъечIзава вахтуна.
Чун сад садаз душманар я талгьана,
Варз авачиз жедач вичин тахтуна.
Бес чун вучиз, са стхаяр, вахар яз,
Сада масад ягъиз, рекьиз гьатнава?
Ислягь вахтар аквазва чаз ахвар яз,
Вучиз садбур ватандихъай катзава?
И кардин сир сад я - чун чаз кIан тахьун,
Аламат я ахьтин рикIер къван тахьун!
Адамалай Хатамалди дявеяр,
Авурбур чи пачагьар я фитнедал.
Кьейибурухъ гьикьван шехьна дидеяр?
Вилер михьиз кьилихъ галай фитедал?
Бес чун вучиз физва чIуру адетдай?
Югъ-гьа югъ яз, йиф гьа йиф яз амазма.
Я инсанар, за квез гьикьван минетда?
Вучиз гьар къуз куьн къал-къулдик кумазма?
И кардин сир сад я – чун чаз кIан тахьун,
Сада садаз багъиш ийир чан тахьун!
Кьуьдни, гадни, гатфарни зул - йис хьана,
Физва дуьнья халкь хьайидлай гуьгъуьниз.
Гьарда вичин кIвалахзава кис хьана,
Сада садаз авач хьи фур эгъуьниз.
Бес чун вучиз девлет кIватIиз, нез тежез,
И кьадардин нефсер вучиз къаних я?
Дуьнья чпиз хьайитIани бес тежез,
Вучиз чи къаст сада масад кьиникь я?
И кардин сир сад я – чун чаз кIан тахьун,
Гьар са тIалдин герек тир дарман тахьун!
Девирар къвез, физва кьеряй вацIар хьиз,
Гьар девирдихъ ава вичин тарихар.
Фитне, дяве кикIизва чак цацар хьиз,
Къалур ийиз вагьшивилин синихар.
Сад Аллагьдин хатурдайни ислягь яз,
Яшамиш жен и мугьман тир дуьньяда.
Чилер, цавар и кьадардин ифрягь яз,
Вучиз чун чахъ галаз ава дяведа?
И кардин сир сад я – чун чаз кIан тахьун,
Инсанвилин лишан тир иман тахьун!