СЕЛ
Завуъ тупар тІуркІури
Жил‘инна ахьра амсар.
Кьяркъли дифар уркури -
ХутІлиин нежбер ал сар.
Биши гъугърумар гъагъи
Гъулан гъирагъдиз гьаъра.
Ритнарси дифар чагъи
Шли-вуш ичIаригъ гъяъра.
Хай бин гъибихъси, «гъарзар»,
Дерейиин хутІил али,
Зав‘ин дахьганси гъюрдар
Мюгькамди сикин гъаши.
Ккарахури лап вягьши
ХътІюкьруси сар гьам сяаьт
Айи дифар зат дарши,
Кубжри нежбрин аьгьвалат.
Магьа, гьамус-хъа, зягьди
Ву дюн‘я ккидипруси.
ПІилтІар хъахьри тяди,
ТІурфан а ккепІнайиси.
ТазабаштІан гъугърумар,
Цийир йивури жилиз,
Даргъури тепйир гъумар
Багахь шула сар касдиз.
Дугъу ибак дарапІган,
КьастІанси цІа гъиву хутІлиз.
Ккабхънайиси лакІлакІ ган,
Чакан хабар тувра нежбриз.
ХутІлариан имбудар,
КІару диф дагъдихъ хъмиди,
Буш жанарик кипну жвар
Гьергру, сар ляхнихъ хъмиди.
Пис гучІ гъабхьну дурариз
КІару «кІул» хътІибгъну кІури.
К1югъял жанар гьарсариз
Гъахьну, мархь кубкьур кІури.
Мушваъ мархьлин гьял адар:
Нежбрин беден «селикк» кка!
Дугъаз дидкан гучІ кадар:
Нежбрин тямягь ХутІлихъ хъа.
Набши сел, набши тІурфан
Дере мучІуди дебккру?
Илбижну кІару «кафан»
ХутІлиан нежбер гьергру.
Саб сяаьт, … кьюд йис гьяри
Амсар элекну гъаши.
ТІурфан гъубгъундар, нежбрин
Хасият уьбгъюз дарши.
Аьхир имбудар аьрхю.
Гьар чпин хутІлариз хътаку.
Дагъсиб юкІв айи аьхю,
Сар Нежбриз икрам гъапІу.
Халкьдин гужли Ялавну
Убгъуз хъюбгъю сел дебкку.
ХутІлиин гагь иливну,
Миркклихьан думу ккебку.
Гьякьвал гъи дарин ХутІил
Миркк йивнайи нягьякьди?!
Дугълан кьатІ апІурхьа тІил
Гьари, чан кІван мяданди!
1988