ДУСТ ЙИХЬ УЗУЗ
Йиз келлейиз аьгъю гъабхьундар
Дуст кас чахьна фицир дисуруш.
Бай вахт хай кади гъучІвубкьундар
Аьгъдарди йигъар фицдар гъюруш.
Гьяйифки думугандин Керим!
Йиз шилнаъди лицури шуйи.
Абгрур дайи сабанра серин.
Жикъиди, якьин адлур вуйи.
Йиз улариккан дургну думу
Икриъ гьаммишан рякъюрушра.
Гьич гьяйиф апIрур дайи мутму
Чахьан зат дарди гъябгъюрушра.
Буш‘вал кайир дайи асуллагь.
Тувру юкІв шейъси гьугъубжвуйиз.
«Зат шулдарда ктарди тахсирра» –
Йиз фагьум гьаци дугъубжвуйиз.
Мяаьшсуз гизаф дустар гъахьунзухъ,
КкюдютІюри – йиз жибдин тюрккер.
Зигурийза дурарин язухъ
Вуйиган чпи мижранси чиркквар.
Аьхю духьну кеспечйир гъахьну
Йиз дустари чпиз арха рякъ дабгну.
Узу чпихъ хьну-хьундар – гьархну,
УлтІурччвру гафари гъал кабгну.
Наши думу, наши дуст, гъучи
Узуна чав зат пай дарапІрур?!
Гьярамдикк ккагъну а гъуллугъчи,
Тек мугъара, абцІу хил абгрур.
Миркк духьна, дугъкан ктІурччвуразу
Иман Агъайихъ либцурайиз.
КІваз Сар гьудруркІри ургуразу.
Дугъри Дустрахъ жан либцІурайиз.
Аьзиз Кас, хъана Дуст йихь узуз!
Йиз Увухъди хьуб метлеб вуйихь!
Кьувват ибшри апІрудариз цІуз!
Гъарахри аку фикрар улихь!
ГатІахь думугандин хиялар.
Улдугнийзу, аьгъю йибхь увуз.
Шулдарзухьан апІуз йиз тярифар.
Аьзиз Кас, гьуркІу Дуст йихь узуз.