ШАИР

 
ШАИР

«Кьалам, кагъаз,
гьа-а,
сарун ккуниб,..
агьа,
килбит, папрус»,
– ча шив, рюкъичра.
Лиг гьа,
гъапундариз макІан,
бирмшар узуз мапІан,
дарш узу йиз ужудар фикрарихъан хътатІурву.
Гьаддиз гъи арайиз
фукІа дуфнадариз.

Арччул хилиъ кьалам –
гагь кагъзиин диври,
гагь кІакІ кучри.
Гагул тІубаригъ – хьубпи «кьалам»,
кІул‘ин,
гъварднарикк,
цалариъ
«диф»
варж гьяйван йихру.
Хъасин,
рюкъич абцІнайиб хъизигну
хъюмлу кьюб тІубу
тинси гъапІу.
Дипну кьалам кагъзиин
кІул,
унтІ,
гарцІлар,
келле,
шархьлар кьюб кьябаъ хиларин тІау,
уьлчІюкьюри улар
кчІикьурайиси тІилисимдиз кьалмик кадру,
кагъзиин алдру,
«дифрягъ» гъядру,
гъарднарикк ккадру.
Фагьум гъилибху ниятназ
кюмекназ
чарасуз
гъюз.
Фикрари келле абцІнайи
фу вуш абгури;
гьядисйир ккидикьурайи
гъушдар накь,
шулайидар гъи,
шлудар закур;
хутІлар хътакурайи
гъизил чвулихъ хъитІруш аьгъдарди,
ясан бахтавар жан хьадукрахъ
учв хъубкьган юкІвар шад апІру,
хъа йифар айиган пашманди гъитру,
хьадукар вушра кьанди гъюру.

«Мици хай шулдар...
...Сталин фуж ву
дугъкан бикІуз узу? –
дин, жанар гъитІу
жарадин ушварихьди,
жвуван ушвнин кьацІухьди,
кьацІ алахьури жарарин сппари,
хъа гъучІвубкьуб чав хътІюбкьюри -
аждагьа!

...Брежнев хъа аьхю аьрбатан,
мятан,
тІафал!
Мурарикан шиир уччвуб даршул
нагагь гьенгнахъ хъипри гъабшиш,..
хай шулдар.
Гюзел ватан,
уву узуз гьадмукьан...
Яваш гьеле сабан,
мициб шиирра а
сар шли вуш,
фужари вуш,
заказ дапIну дибикІнайиб -
ачутучут гъабхурайир дарза.

Бархликкнарикан?
Ав, бархликкнарикан узу сифте гъибикІиш,
му аьхю хъуркьвалу.
"Бархликкнар бархликк уржрудар ву..."
Хъа вуш фу ву?
Мура мяънасузсиб шула.
Гъигъливарикан? –
"...дадайи чан бицІириз ккаърайиган
гъив, гъив, гъив,..
хъа бицІир аьлхъюр
маш гъяди ригъдин".
Валлагь хъбалгурайиси ву: –
"хъа бицІир аьлхъюр
маш гъяди ригъдин,
дих кубкІган бабан
чаз гъигъливар ккаъган..."

Эргза гьа бегьем,
саб-кьюб чІуф дапІну папрусиз
хъа апІарза йиз мяъли бегьем».
– Я шив, хъебехъ,
успагьиб шуладарин?
Мициб гьунар
шаирариктІан ктар гьа!
"...хъа бицІир аьлхъюр
маш гъяди ригъдин,
дих кубкІган бабан
чаз гъигъливар ккаъган..."
Гъач, уву гьенг кадабгъ,
хъа узу,
дизигну папрус
ккудубкІидиза гьаммус.

Хъана,
хьуб папрусилан
кІул гъяпІу хиларигъ
давам апІуз ккунди чан шиир.
Амма,
фикрар:
«Футбул а гъи гьа!
Сиягь ибшривучв му мяъли».
– Я шив, наан даахнава?
– НаанкІа,
ишурайи бай ккарцураза,
гъигъливар ккаърашра аьлхъюрадар.
Ригъ ашра мугъан маш амсиди а,
дугъридан мархь убгъурайиси.
Мугъканра «шаир» шулуш кІурза
йиз багьа вуйи жилирси.
– Яв гафар гъит,
мажал адарзуз,
футбол а гъи,
«Нефтчина»  хъана фунуб вуш командайихъди...
– Хъа шиир?
– Шиир гьебгну кІул‘ан
наантина гъябгъидар,
хъа футбол
телевизори кьюбанпну улупидар.
– Улулупиш зат улупуз амурра дарапІричаз.
Беле улупидира дар!
Ток адар!
– Ай бала ву.
Баладар я кас,
шиир бикІарза;
шаирин пише гьадму ву;
аваза даршра
шиъраркьан духьну ккун.
Лиг гьа, шив, гъапундариз макІан,
яв бирмшар узуз мапІан.
Кьалам,.. кагъаз,..
рюкъич,.. папрус,..
кІул хиларигъ,..
фикрар гъюляригъ,..
кади зурба фурс... –
шаир!!!