Хялижв

 
ХЯЛИЖВ

Гъач, Хялижв, гъач. Йиз паж увуз чІяаьну.
Къюдкъюдар апІрудариз жаваб азуз.
Гъач, кьяляхъ миван лик, гъач. Аьрбатану
Думу учв. Дугъан тарихра аьгъязуз.

Гъи вахтниинди Уву гъафундайиш,
Якьин кечел духьну гъузрийи узу.
Яв гьунарарихъан ниъ гъизигундайиш,
КІвахъни вуйидаризра хьивдайи ужу.

Гьамцибу, Кас, бахтсузарин яшайиш.
Аьгъязуз Увузра дархьиб бегелмиш.
Узузра дугъансиб иблисвал айиш,
ШуйкІан намус узхьан апІуз алдатмиш?

Бахтлу пай ктар макІан му дюн‘яйик йиз.
Сар Увхьан  гьерхраза думу фициб шулуш.
Яв ляхнари вари жан дибиснайиз
Дигиш апІин думу Увхьан удубкьуруш.

Явра бажаранвал лазим ву, Хялижв;
Гъач апІухьа Яв ният узуз таниш.
Ва убкну гьялкиъ, рабгъури, бисну рижв
Дицухьа, бахтар апІуз шулуш гъазанмиш.

Гъач, Хялижв, гъач. Фужушра ву баладар.
Ав, фуж вушра, йиз пажаккна гъюрава.
Ув‘инди вуш йиз чарйир гьаваи дар.
Гъач, Хялижв, гъач. Гъи мани шула гьава.