КІВАИН АЛАУРА
Инсанариз ва гьам гьяшаратариз
даккни,
кьутІкьал,
учІвру,
тІагъру йигъари
кьюрдну чпиккан ккадархьуз гъидритди,
зиз
хъади кІваин алаура дурари
уьмрар, думукьан ярхиди дарувал
ригълу йигъар гьавайиди адауз,
иллагьки
хьадукран эвелариъ,
лал
гъашидарин келлейиъ ухди абчуз.
Бурж тамам дапІну гъябгъюрай хьадукран
дифлу,
амслу,
мархьлу,
чиглу йигъари
хълибгури гъибтнадариз чпин дуклу жан;
кІваин хура хъа фаслин ляхнар вари:
гъулан кьялаъ раццар дурхьивал
сатІлан,
шаларин гъубзру ггаж уч апІуз шлубси
жизби гъузрайи вахтар дарапІди айтІлан,
гъалабсуз малариз жаг абцІуз шлуси.
Нирихъ,
ахникк,
рюмкайихъ хъайидариз
микІлу,
урцру,
амкІлу,
ярхи йигъари
кІваин алаура гъюру вахтариз
тахсрар илтІикьуб
жвуван-жвув‘ин
гьари:
чвлин тІяаьмлу пайнахьан мягьрум гъапІган
кюмекнан кьимат фикирназ гъадабгъну,
сумчрин ицци гъармйирик ниъ карапІган
мюгьюббатнан сини ярхлаз гьадабгъну.
Жибар ичІи гъапІу
хутІлар –
багълари
ва
вафаллу
амси
чигран зазари
кІваин алаура
гьар чвлин йигъари
бедендиз лап иццрушин казабгури:
даккни,
кьутІкьал,
учІвру,
тІагъру,
пис йигъар
мани кьюрдун
аьхълушнарихъди гъюру;
папрус,
ахин,
ичкки
ва
гъухригъ гъяйи кьар
йифар ургърурихъ
даккунди
гъюри шлуб.
КІваин алаура
ухьуз
гьарсариз
хуку кьабси
кІакІра таз али
абгуб яшайишдин,
кефлу йигъар илтІикІури вазариз –
Абур абгуб намуснан,
гьялалвал – вардин.