НАСИГЬЯТАР
Ляхинкарсузвали жан ипІуруш,
Якьин думу касдиз дубхьна фу-вуш.
Учвхьан цІибкьан кюмек апІуз шулуш,
МапІанай, темпел ву дупну гъитруш.
Жвуваз гъеебхьу гаф жарадикан
Агъдарди гъузиш асас диб дидкан,
Дишла микидипанай ичв жандикан,
Мумкин ву, я футнакар ктауз, я – гъван.
***
Гьилигури, адру кас, чан ният
Хасиятнахъ хъайир дар эгьемият.
Бикарди, чав-учв хьуз гъитри баят,
ГучІ а дугъхьан, чІур шуз меденият.
***
Гьарсар кас сар-сариз буржлу вухьа,
Амма бурж кІваълан гьархри шулу гьа
ЦІиб учв за гъашиш, гьамцира пухьа,
Иллагьки фурсар кайидар багьа!
***
Гъян ичІидарин хил абцІри шулу –
Му усалвалин сабпи лишан ву.
Дицдарихьан ккун ихтият духьну,
Яв юкІвра дахъ даршбаз галам гъиву.
***
Пис кьаст кІваъ ади рябкъру мутму дар,
Мегер хъубкьгантІан гьаддиз йишв бакар.
Кьастназ гъахьиган ляхнар барабар
Сарун зиллетар даршра баладар.
***
Файда даршул гьамцир дуст хъайириз:
КІарубдиз кІаруб ву пуз аьгъдруриз.
Дугъан кьаст ву жараб, гъавриъ хьайиз
Ухди илтІикІарва, кас, кІарубдиз.
***
Фарфалаг худ хъабццайиз алдабкиш,
Аьгъяхьуз дидиз фициб тахсир аш.
Жвувахъ хъайи давди ад гъудубгиш,
Агъдархьуз ихь дустраз гьапІуз ккундаш.
***
Пич ккядябхъяйиз аржлар ктІуршвуру,
Хъюмру ккаъну рюкъяриз илтІикІну.
КІван рюгь ктІубшвайиз фагьум абгъуру
Гьярам ипІрудари уф илитну.
***
МикІ хъивган мумкин адар рюкъяриз
Мершв йивури кюкйириз, рякъяриз.
Асар шулдар гафнакан бюркьяриз –
Улиъ рюкъ абхьурив чпи рякъяйиз.
***
Гъахма лампайигъ – акв ву гьарсариз;
Гъахма люкьран – гъарма чан чиркквариз.
Жвуву кьан гъапІган Уьмрин дарсариз,
ЦІин мелзар писди йивурихь юкІвариз.
***
Шид мичІалди уьбхруб ву ругдин гвар.
Мурта ицциб ву алиб ижми гар.
Убцру дапІнаш, уьл убжруб – дернин гар.
Алирикан гьапІур хилариин гар?!
***
Зарал адар ву пну чиркинди ччал,
Дидиз аьгъдар инсандин марцци чІал.
Ихтият йихьай алидарихьан ччвал,
Эбццайиз гъярихъ хъайи уччву чІвал.