ЯД
Вари кюкйирихъ аваза хъаш,
Думу дидин рангариъ тІапІна.
ВуйибтІан артухъ гьирифрурихъ яш,
Авазайиз ругар кадатІна.
Ва гьадмуган гюрчег кюкйириз
Сабанра вахтар яд шулдар.
Дебккнайи бурж хури арйириз
Дидин успагьивал ккутІрадар.
Инсанарин уьмур жараб ву,
Заълан гъилигган – фукІа дару,
Ужуб–харжиб айи гьисаб ву
Учв ими-имдар, хабар кадру.
Гьаци дубхьна гизафтариз гъи;
Фу ву хъа, аьзият ктар, я – дердер,
Я апІуз ккадар гьазкІа гъизгъин;
Гьибхна Гьякьвалихь диндин перде.
Бахтаврар, кІури шулу, саспиган,
Гьацдарин вижнасузвалариз кур.
Кьяш ктру уьмур чпиз хас вуйиган,
Вушул дярякъди духьнайиб къур.
ЮкІв адар чпиз саб гафниинди,
Бахтлур, аьжуз фуж вуш аьгъдарди.
Ккуниб-даккниб саб мелзниинди
Дарпишра гъузра фукІа дарди.
Кюкйир гъяцІал шлуган юкІв кабцІру
Хабахъ дидисну кьаназ гъитуз.
Ил алдаршра «жан» пуз гъян абцІру,
Вахтназ гьарай ипнайиси, ккарцуз.
Адар чара инсанарихьан шлу;
Айиш саб дарман абгуз шуйи.
Гъит ишри гъюру хьадукраз чру,
Хъана ад ибшуз дава вуйи.
Фу дубхьнура яд шулдар кюкйир.
Хъа вижнасузарикан гьапІру?
Яд шулу дурар айи уьлкйир,
Йишв тахсир вуйиси кур апІру.
Дурар даккунди яд шулушра
Йиз жандик кайи нукьсанар ву.
Яд дарди, марцци йиччв туврушра
Йиз кІул‘инна аьхю бал‘ар ву!
Яд, кюмек апІин шулуш увхьан.
«Жан» гъапІиш, яраб фици шуйкІан?
Зат аьгь апІуз шуладарзухьан
Гьацдари ккидипурайиган кІан.