СИВИЪ ДУГЪАХЪДИ
Сивин кIакIниин алиган узу,
Сар риш гъяркънийиз гъягъюри.
Гъвалахъ хъайи эплихъ гьитIикIну,
ЧIигъар апIурайза, гъач кIури.
Думу чIалра даркIури рякъди
Фикир тутрувди чан гьярайи.
Пагь, маш дарин фукьан ачухъди,
Ригъдин нур гъябгъюрайиганси!
"Уву узухьна гьаз гъюрдарва?
Эй учву, гьа-гьарай, гьа-гьарай, -
Гьамус чIигъар апIуз хъюгъраза, -
Мугъан аьламатвализ лигай!"
Думу риш фуж вуйкIана, агь мицир,
Сарди узухъди сивиъ айир!
НивкI вуйкIан узуз гъябкъиб гьамциб,
Даршиш гьюри завариан гъафир.
Затра узхьан гъузуз шулдар,
ГьапIза зу, сикинсуз эй халкьар?
Думу йиз фикриан гъярадар,
Яшайишси гьялаклу марццир.