УСТЛУВАЙИЪ КИРОВДИЪ
Фукьан гъуз'за зу ву хъазухъ кIури,
Жарарихьна гъягъюз уву гъидритди.
Даршулазухьан гъузуз сарна-сарди,
Уьмур гьаму дарин фукьан кьутIкьалди!
Рякъюрайиз улариз уччвур,
ГьапIрайир вуйкIан думу мицир?
Гьадгъиин дахьна йиз цIа улар,
Хъа кIваъ айир риш вуда жарар.
Дугъаз лигураза ижмиди,
Сватнан рангар гьюдюхюри.
Касар уз'ин дийигъна вари,
Шурак мугъан фу кайкIан кIури.
Учирчихъди зуз хъзигуз хъюгъну.
Риш узхьан ярхла шула думу.
Хлиъ айи йиз лемче адабхъну,
Кьул'ин гъагъи ахалси дабхъну.
Уччвур кьяляхъинди илдицну.
Учирчихъди узу хъидицну.
Деллу йиз фикир ачмиш гъабхьну.
Хъа думу Мери риш дардихьну.
***
Дугъанна кушар фукьар гюрчегдар дарин!
Кьяллансина эрхнайи гъатди уч дапIну;
АпIурайи зарзрари кIул рибшвурайиган,
Узу гьамциб кфир дарсузвалихъна гьаъну.
Узхьан багахь духьну дугъак кучуз шулдар.
Гъирагъдиз гьадаиш, ушвниан гаф удубчIвдар.
Уьл ипIуз гукIунди муччвур бисуз шулдар,
Тямягь хъади я дугъахьди ипIуз гъитдар.
Сергей Есенинси авдал гъахьундарза.
Гьич сар шурахъкьан жиниди хъергундарза.
Ккун шулдарзуз мак апIуз жвуван даруриз,
Инсан-инсанси гъузну ккундуда гьаруриз.
Аьгъдарзуз фицдар лишнариинди кьяляхъ апIуриш диди.
Дугъахьна гьачIарккруган ву йиз жан узуз гизаф къаршуди.
Гьаз вуйкIан узуз, терг гъапIу душмандизси терслуди?
Йиз уьмур чаз, чан аку узуз, гьюдюхнийкIан йизнури?
I983