ФУРИ
ЧIур инсаниятдин инсафсузвали,
ГъючIюбгъю мучIмучIиин каф али,
Ихь фагьумдик газзам-биргъар каърайи,
Йизна дугъан арайиъ тур дубсрайи!
Бякьяла хусусиси - жара юхсуз
Касибарин дамарариан рубзуз
Гъитру - ифдихьдина амкIухьди абцIуз.
Дидкан гъапIу бомбари дюн'я ебцIуз.
Та-трах газгузаригъян лигру ШейтIан,
ХъибтIну чахъ леген, лазим гьялназ гьарган,
Содомдиъ бегьем гъургну - язухъ зигай!
Дугъхъан варди лайикьлу "сесер" тувай!
Улхбари, дугъан дюднигъ белччем гъябсра!
ТIавкIиъди жараб хьади гъарах "Вечер"!
Падишагьдин гюн ццийин кьюрдиз ттабсра.
Тув тухъ хьуз кучIал футнийирин вечер!
Ухьу илбицнигихъди илдицухьа?
Бюркьюдарихъди ихь жанар хъарццухьа?
Дарш, дурарин кIанччаригъ дюн'я гъяпIхьа?
Ваъ, дурариз жара "рякъ" улупурхьа!
Гьюкуматар са-сабди жарадар ву.
Хъа жарадар мясляаьтназ сабси ву.
Аьхюрзаман ихь сабвали хътабтIуру.
Диндиз дюн'я зегьер мапIанай кIуру.
"Узуз фури ебккидиза дийикIуз.
ЧIивиди узуна ШейтIан гъуздича.
Атомдин бумбарихьан гьич ккидапуз
Хьибдар ич мукь, хуш кефер апIидича!
Фурдиъ учуз ислягьвал герек дарчуз.
Пис аз’зарарси утIури ккундучуз.
Мершв йивну аку жилиинна улдучIвуз-
Гьязур вуча женнетдиъ ликар ивуз!"
ГьапIруб ву бомбарин кьяляхъ аку жил?
АлмикIан дид'ин чан муганасдин шил?
Кьан дар фурйириан атом терг апIуз!
Инсаният ислягь гъаравлиъ тIапIуз!
Сентябрь - 84