Хъфена к1аниди гелер амукьна,
Вилери лугьузвай "мад хкведач зун".
Рекьера ишелрин селлер ацукьна,
Гелери лугьузвай "мад хкведач зун".
Гуьгъуьна килигиз шехьайт1ан цавар,
Садрани элкъвена килигнач хьи яр.
Гуьгъуьна минетиз зверайт1ан шагьвар,
Садрани элкъвена килигнач хьи яр.
Чир хьанач, чан Аллагь, вуч хьанат1 адаз,
Са гафни талгьана ч1урна чи икърар.
Шейт1анди закай гаф лагьанат1 адаз,
Хъуьрезва яргъарай экъисна к1ирар.
Гьар са гел зи рик1е хьана хьи са хер,
Яр яргъал хьунувай рик кумукьнач захъ.
Яр хъфей рекьериз ягъада за пер,
Хтурай а гелер зун галай патахъ.
Рик1е ц1ай, къвекъезва гьатна мекьера
Зи къвалав къвезавай селлер жагъуриз.
Чирагъдив къвекъвезва гьатна рекьера
Зи патав къвезавай гелер жагъуриз.