Жагъура зун...
Чидач заз вун гьинва, вуна вучзава…
Чидач заз гьикI ятIа я ви ругьдин гьава.
Гугрумиз чкIайла цIайлапан цава,
Жагъура вуна зун, жагъура вуна.
Дердерин, гъамарин къене гьатайла,
Саврухри, марфари, гару гатайла,
Патав кас гамачиз чара атIайла,
Жагъура вуна зун, жагъура вуна.
Белки, вун пашман я, хер ала рикIел,
Белки, умуд галаз вил ала рекьел,
Алатай гьиссерихъ хьайитIа цIигел,
Жагъура вуна зун, жагъура вуна.
Санал акъатай чIав чун патал – тарих,
Амма япар мад ви гафарихъ – къарих,
Белки вун чинеба хьанватIа дарих?
Жагъура вуна зун, жагъура вуна.
Дердер пайиз-пайиз чара хьанай чун,
Садаз хабар тийиз къеняй канай чун,
Къе вучиз рахазва инай-анай чун?
Жагъура вуна зун, жагъура вуна…
Б.А.