БАГЪРИ ЧIАЛ
Йиз багъри чIал- лизи шули айи чIвал,
Жигьилихьна тувуз удудукьрай ирс -
Аьсрариан гъабхиб ктадабхъди урчIвал,
Имтигьянси дийибгъуб наслиин йиз.
Арццуз шуйкIан увуз закурин урчIар?
Йиз чIал, яв сес гъубзуйкIан йиз ужагъдиъ?
Дарш, гъийин йигъариъ рюгь дубхьну мичIал,
Зяя шуйкIан уву уьмрин гъирагъдиъ?
Йиз багъри чIал - йиз ччвур, йиз юкIв, йиз мяна,
Йиз гьял апIуз рякъяр агурайи дерд!
Фици гъапIиш, уьбхюз шуйкIан яв хазна?
Фици гъитди яв бин ккайиб хьуз эвлед?
*Картина Магомеда Мурадова "Оберегание"