Дюн я гъипра дявдин цIигъ...

             


Хярдин кюкйирин убзраза чай ахъли,
Амансузди ай жандиз шул пну рягьят,
ЮкIвра айиз ипIурайиси мюлхъи,
Бихъур узуз дарман – чара бажагьат.

Инсафсузди дюн`я гъипра дявдин цIигъ,
Пай апIури Жилра цIиквин чIукIарси,
Ерхьрур адар я бабарин ишал, чIигъ,
Жигьил юкIвар а тIуркIури гюлйирси.

ЦIиб хьундар дявйир улихьдин аьсрариъ,
Жилин зийнар сагъ духьну ккудукIнадар,
«Ваъ» пидихьа дявикрариз гьарсари,
Улихь гележег хьадарди хьну ккундар…