Ярхлариан аза дуфну...

            


МичIли мархьлиз илтIибкIну диф
              Накьси гъира,
Гъи – закур убгъруганси йиф
              А йиз юрдра.
Хиял апIин, узухъ хъебгна
              Му аьхълюшин,
Абгури ригъ, мани кьибла,
               КIваз манишин,
Ярхлариан аза дуфну
               Дагълариз йиз,
Азуз гьибгъри, узу хъуркьну
                Кафарийиз…
Чру шаларик кюкйир лизи
               Карчди шли – вуш,
 Абгураза ургам йирси,
                Дидигъ жин хьуз…
Мюрхюн гьарикк хьибдиз кIваин,
                Юрд гирами.
 Гьугъубжвур нугъатра мукьмин,
                Рубас  нирин.
 «ДагълартIан уткан ву дагълар»,
                Пундар давди,
  Саб – сабдик карснайи хулар,
                Цалар гъвандин…
   Аьдатарра кIваъ гъузнайи,
                Мукьмар цIийи…
   Вари майил – мадат вуйи,
                Йиз юрд бицIи…