Бир бири ызындан къысха кетген атамы бла анамы юйлеринде къалгъан кече жазылгъан назму
Ма энтта бир кюн батады
Таула артына сизсиз...
От энтта кёзюн ачады,
Сизни тансыкълап кемсиз.
"Ярабий, къайдалла была?
Бир кёрюнмей къалдыла!",-
Дегенча, сейирсинип,
Кёрюрге умут этип,
Кюн таягъын узатды.
Сизни тапмады... Батды...
Ингир ала эки булут,
Баям, жел бла демлеше,
Кёкде урходук болуп,
Тюк-тюк болуп къалдыла.
Ала сиз болурмусуз?..
Кёз байланып "эки жулдуз,
Бир бири бла сёлеше",
Жарыта бу жер жюзюн,
Бийикден къарадыла.
Ала сиз болурмусуз?..
Эл башындан жарты ай да,
Мутхуз жарыгъын жайды,
Тийреде, арбазда да
Сизни изледи... Биягъы
Ол сизни юйюгюзню
Терезесинден къарап,
Ичин мудах жарытды,
Намазлыкъда шош тохтап,
Бир ауукъну сюелди.
Сизни тапмады... Кетди... 2013