САБРИ ДЕРККРУ ДАГЪЛАР
Му гьядиса гъабхьиб ву хяраъ,
Кьаркьул дагъдин узи ямажнак…
Дидкан ассар адрабхъир гъянаъ
гьич сар гъузундар гъуландарик…
– Кьувват ибшри, дуст! Фу ляхин ву? –
Чан хяраз хъуркьру сар гьялакди.
– Ай сагъ ишри, гъула жви! ГьапІну? –
Гъапи тмунури архаинди.
– ГьапІнуш, угъраш, рябкъюрадайвуз,
йиз пай хяр убшвури улучІвуз!
– Угъраш фуж вуш улупарзавуз!
Яв аби му йишв васият дапІнайнуз?!
– Шлин абйирикан улхурава…
Гьаммус жиликк ккитІикьарзаву!
– ***ин балин хуйин жинс магьа,
ккутІну, йивну уьрхдикІан завуъ!
Дирчну дергсар, апІури люкьнар
кархьу мурар хяран кІуллан…
Сариз ккунди а вари йишвар…
Тмунурра архьра чан тямягьнаан…
Кьусмар йивура чиб-чпиз уч1вру
аьгъдарди чиб инсанар вуйиб…
Алдру рягърягъяр дап1ну уьру
даттарси а, сарин кидипну иб.
Дурар рякъюрайиси дифариз –
тяди хъуркьну, гъараху завар.
Ихт‘яр тувну кьюркълин цІийириз,
тІурфни ккидирчуз хъюгъю сивар.
Мидкан вижна ктарди кьюредра
а, дидисну утІукьну кІулар…
Кдиргъуру дурар гъарзарихъна
ккайидар аьхю хьарар, кьулар...
Сабпну элегнайидарин заъхъан
бомбар гъивси гъахьи яман аквар...
Гъугърумарихъди чпи али йишвкан
кадахьну диргъуз хъюгъю гъванар...
Мура, тмура, гьял дубхьнайидар,
зарбди гучІ кабхъну, гукІни гъаши.
Палтар дячІяргъну, кьяши духьнайидар,
саб хьаракк ккадаркну, сикин гъаши…
Клигури гьар чпин жанарикан,
кІуруб адарди, ккебехънайи...
Магьа ктІиппайизра т1урфан
дурар дергсарихьна гъажаргънийи.
Фу лигурва, кьюркълин цІа йивну,
мас айи банкар, я дергсар хьимдар.
Дурар али йишв‘ин хъюрхълар духьну,
хяр вуйибкьан аьгъю шули имдар…
Кьюридра минди-тинди гъилигу…
Лигури чиб-чпиин гъяаьлхъю…
Хъасин мурар му ичІарикан клигу…
Клигурайидар мушвягъинди гъяхъю…
Хът1юкью хъюрхълари дустар…
Фйир ап1урава саб гъагъ ук1ан к1уллан…
Содомдинна Гоморайин инсан?
Гьаддиз к1ура: сабри дерккру дагълар…
Хъялну ккудирчуру гъулар-хулар…