ГЬЯКЬВАЛ УЬБХ
Жанаврар ятгъариъ архьнура
Гашди гъитрадар чпин бякьйириз.
ШибритІариъ хяхлар ахьнура
Бинишв гъибтрадар бякьялйириз.
Табиаьтди чаз зарал вушра
Фагьум бахш дапІна инсанариз.
Чпи зазар, сулар, силар даршра
Гьацдар духьну ккунду гьацІариз.
Гъарзарилансина урснура
ТІирхуз улупура люкьяриз.
КучІлик аьрсуз машар курснура
Ял апІур давди люкьнариз.
Яв буржлу гъайгъу зиг, эй инсан,
Бурж даруб дипну гъуз гьякьниин.
Аькьюл, ягь, гьар сар-сариз масан –
Месигьди тувнайиб му дарин?!
Хьадукра жил къурагьди ашра
Гьари шире тувру кьюкьяриз.
Саспидариз чпиз аьйиб кашра
Гьякьяр йивуз гучІдар к1уч1лариз.
Гьякь гатІабхьара, уьмур шулив пуч;
Баладайи уву вуйиш сар;
Лиг ярхлазси, кІван симарик куч;
Наслар яв кьяляхъ хъми увустар