ЧВЛИН СУРАТАР
Сюрйир галариз хътакурайи –
Гьамрар чІяаьн дарин суратар?
Мярхяр сивариан хурайи –
Гьамрар чІяаьн дарин сурсатар?
Дарш дифари мичІлишан хура,
Ухьуз аьгъя-аьгъдарди пухьа?
Ук1ар-кІажарин чрушан абкура,
Ухьуз даккунди вушра кІухьа?
Аьхъарин тІурнахъ хъахьди малар –
УкІ адрудариз гучІар тувхьа?
Даршсан ручІари ккаъра шалар –
Вардиз аьгъюб кьуттли апІухьа?
Чвлин суратар инсанаригъ гъя…
Гьар жюре рангарихьди машар
Фурарикси гьюдюхюз аьгъя,
Бизар дарди урчІури гъашар.
Сарун гъузнамиш ичв суалар,
Арайиз адагъну савкьатар,
Уьрхярчва улиъ чвлин суратар,
Лазим шлубси диври кьиматар...
Мик1лу хьадурарра, къуру хьадра,
Кьяши чвулра, гъюдли кьюрдра –
Йиз суфатнаъ айи суратар магьа
Гъи узуз къаршу жара саягъ духьна...