Гъягъюрайза саб ражну дюз рякъюъди,
Дахаргназу, цIасиб ригъдин нурари,
Анжагъ, саб дупну, йиз бизар улариз
Гъябкъну булагъ, ккебкнайиб чIвалан гьари.
Дусну гьарикк, хуррамди шид гъубхъиган,
Гъябкъюнзуз му чIвалан гюзел уткан жан,
Чру рангнандар ярхи ургъйир эрхну чан,
Хуб уткан гьар даринхъа аьламатнан!
Кьаби дубхьну рябкъюраки гьарин юкIв,
Дубхьнайиганси чан жандин варж йискьан,
Ис алабхъну, дубцнайиганси чан юкьв,
Пашман кюлер эрхнайиган жилизкьан.
Йиз юкIв, микIру чIвалан гьарси, тIубччвура.
Жигьилвалин вахтар йиз кIулиз гъюра
Ккун дубхьназуз гьаз-вуш дийигъуз ликри,
Рякъюн багахь, чIвалан гьарси, ялгъузди.
Ебхьурдайзуз думуган дих гъапIишра,
Гьамус абхъу кIажун сесра ебхьура,
Гъубшубдикан гьич заткьан гиран дарди,
Вуза сикин, яваш гъапIган йисари.
Серин тувра булагъди, рякъдихъ хъайи,
КIвак кучра йиз, гьевес капIру симруси.
Дийигъунча кIулар эрхну дерд кайи,
Ккебехънайи завуъ айи хядарси.