Вун кIвале авачир чIавара, диде,
Балаяр пашман тир, вил рекьел алаз..
Жедай вун салара, сувара, диде,
БицIекар паталди азият чIугваз.
КIвалахар пара тир кIвалени къецел,
Гагь картуф кутадай, гагь кIватIдай векьер,
Гагь хьраб туьхкIуьрдай, гагь фидай вун цел,
ХъуьтIуьн къай-саврухдив шуткудай живер…
Гъилеваз са кап фу, алтадна дуьдгъвер,
Ацукьдай чун, къугъваз, дакIардин кIаник,
Амма вун галачиз сивел женни хъвер?-
КIвализ хкведалди, акъатдай чи рикI…
Мектебдиз фидай чIав алатайтIани,
Вуна ракъурдачир чун тIуьн тагана.
Нянихъ, лап гьикьван галатайтIани,
Чан-рикIдай вуна чаз, квелин тахьана.
Гьикьван фад чIехи жез кIандай чаз, диде,
Гекъигиз-гурцалдай акъуддай гезер…
Фена чун кьуд патахъ бахтар кьаз, диде,
Сада хуьр хкягъна, садани - шегьер…
Веледар гьикьван вахъ дарих жедайтIа...
Заз чизва, вун гъарикI жезва чахъ гила,
Ваз мукьвал хьун патал чун гьикI шедайтIа,
Ви рикIни секин туш яргъал хьайила …
Кьилеваз гьакъикъат сувун, чIафарин,
И дуьня масакIа аквазва, диде.
Вуна чаз а чIавуз лагьай гафарин
Гъавурда гила зун акьазва, диде…