Бавда оьсген залим емиш терекдей,
Яшав бизин бу дюньягъа яратгъан.
Эки сюйген бир-биревге герек деп,
Гюнеш бизге шавлаларын къаратгъан.
Бав терекде емишлерин савгъатлап,
Ожагъыма шатлыкъ, татывлукъ чачгъан.
Яратгъаным сени магъа суратлап,
Аллагьымны языву гёнгюм ачгъан.
Азиз досум сен-сен мени герегим,
Бавну ичинде оьсген емиш терегим.
Ожагъымны чечек ачагъан гюлю,
Юрегимни йырлатагъан бюлбюлю!
Авлетлерим ожагъымны ниъматы,
Юрегиме насип шавла яшната.
Тамурларынг сюювюмню загьматы,
Яшав ёлну мени булан узата.