Гатун экуьнахъ, къурухда къацу,
Ксанмай хъипи цуькведин беден
За зи к1вачерик авурла гацум,
Жаза тир на заз гайиди, диде:
Вугана залан кередин гичин,
Рекье тунай зун булахдал яргъа,
Зун перт тир акваз ви хъел авай чин,
Ви дергесдик квай цуькверин маргъал.
Вучиз бес вуна, зи играми кас,
И тахсирдилай гъил къачузва къе:
Гагь-гагь ви гуьгьуьл багьа жедач заз
Цуьк кьванни хъипи, кур хьайи векьел.
Белки, вуна къе лугьузват1а ик1
(Зунни дигмиш я ви акьул къачуз):
"Тек са зун патал чимиз тахьуй рик1,
Гат1к1извайла Чил дергесралди ц1ун"...
Гьар са декьикьа вун рик1ел татай
Къайи чиг яз зи чк1анва рекьиз.
К1ват1на, хкайт1а мад гичин ац1ай,
Кьезил жедат1а ви зегьем рик1из?