Аман вахар, азиз дустар
Заз хьайиди хьана хьи къе.
Лекьре яна рикl алай кlек
Рикl гьайифди кана хьи къе.
А зи кlекрен якlар фейи
Ви туьтуьхдай пад акъатуй.
Агь,зун икьван пашман авур
Цавай чилел вун аватуй.
Зи кlек акур ви вилерин
Ишигъ зайиф хьана кьий вун.
Мецел хвейи кlек амачиз
Дуьньядал тек амукьна зун.
А лекьрен лап лекь недай за
Гьатнайтlа зи эгер гъиле.
Адал цlакул тадачир за
Кlвачик кутун туна чиле.
Зи багьа кlек тухвай лекьрен
Ахкунайт1а заз кlарабар
Мад кlандачир гьич са затlни
Кьезил жедай зи азабар.