Бакъыйны жангыз кьызы Фатиматха этилген назму
(Халкъ жыргъа ушатып)
Ой базаргъа Чирик кёлге
Барама деп чыкъгъаненг,
Юйюнге уа, ананг ёлген,
Сен сал болур къайтханенг.
Ой сен миннген автобус а
Жетмеди Чирик кёлге,
Бабугент кёпюрюнден да
Ол кетгенди Черекге.
Андан чыкъгъан къычырыкъла
Толкъуннга кёмюлдюле.
Жауларым да болмасынла
Ол кюн аны кёргенле.
Ой кеси аллынга да болмай,
Нек чыкъгъан эдинг жолгъа!
Этген муратларынг толмай,
Тюшдюнг сен бу кюй жыргъа.
Ой сегизинчи баланг а
Сени жюрек тюбюнгде
"Туумагъанлай тумаланнган"
Дегенлей болду энди.
Ой къашхатаучу жашла уа,
Сени ала тапдыла,
Юсюнгде уа табылмады,
Кийим, жырып алыргъа.
- Аланла, бу дунияда
Ким кёргенди быллай иш -
Экеулен бир къабырда
Жатып къайда эшитгенсиз?! -
Ой жиляйд жарлы Бакъый,
Жюреклени таралта.
Жер башында таш да, тау да
Жарсый болур Фатиматха.
Ол жай август кюнледе уа
Жиляудан юйюнг толду.
"Жангыз къызым" деучю Бакъый
Жети сабийли болду. 1987г.