(«Танъ йылдызы» иджра эткен йыр)
Корьген адам таныр экен – кенъ тарафтанмыз,
Къырым деген улькеден тамыр атамыз.
Шенъ нурларны сачамыз,
Дюньяны къыздырамыз.
Алтын богъдай чёллеринден, дагъ-байырданмыз,
Къара денъиз узеринде учкъан къушлармыз.
Гонъюллерге къонармыз,
Йылдызлардай янармыз.
Бойле къырымнынъ къызлары, къырымнынъ къызлары,
Бойле къырымнынъ къызлары, къырымнынъ къызлары
Къырым къызлары бойле…
Багълама:
1-нджи вариант
Атешли, севимли, кунеш юзюнде,
Къырымнынъ къызлары – бу гуль элинъде,
Эм назик, эм дюльбер, севги эвинде,
Муляйим ве достане
Къырым къызлары бойле!
2-нджи вариант
Къуш олып учармыз, мавы коклерде,
Чечекдей ачармыз, назик эллерде,
Гонъюльни якъармыз севги эвинде,
Ой нари-нари-нари-нари-ней
Къырым къызлары бойле!
Къара козьлю, индже белли, татлы йырлары,
Алчакъ гонълю эм де ачыкъ къырым къызлары,
Чечеклерге ошайлар,
Юреклерде яшайлар.
Бойле къырымнынъ къызлары, къырымнынъ къызлары,
Бойле къырымнынъ къызлары, къырымнынъ къызлары,
Къырым къызлары бойле…
Багълама.
Ноябрь 2, 2014 с.