Ха д1аяхар хьо ваьха ваьлар,
Хьа са эца баьре гучаваьлар,
Дунет1ара денош чакхадаьлар,
Тахана хьо сакъийрда ваьлар.
Уллув саг воацаш цхьаь хьо висар,
Хьон т1ера "Ясин" наха дийшар,
Хьо накъа ваккха гонахь хайшар,
Хьо ц1аккха сомаваргвоацаш тхьайсар.
Хьо лувчаваь, т1а мерчий делар,
Кашмашка д1ахьо бе а велар,
Хьа са доац дакъ б1оаг1 санна улар,
Лаьттано хьо шийн мархьа велар.
Хьо хургйола кхелага хьежар,
Каш хьайна сийрда халийт дезар,
Амма хьо хургдолчох а кхетар,
Х1аьта а, къахетамга хьежар.
Цу хана хьона дика хайра,
Хьа дунен новкъостий а байра,
Ма хила саг, вахаре вайна,
Хуле, ма хургья 1оажал яйна...
Ахмад Шадиев (24.06.2015)