РАМИЗ КЪУСАРЧАЙЛЫДИН ШИИРАР
ХЪЕЛНА ВАЧ
Авачир вахъ гьисс маса,
Яни заз акьул, зи цуьк.
Имни тир ихьтин кьиса,
Имни са мах, тIул, зи цуьк.
Вач, жуван гаф чIурна вач,
Гунагьдилай цIарна вач,
Хъелна, зи рикI тIарна вач,
Дерт гице заз бул, зи цуьк.
Рехъ види, звер кваз алад,
Захъ вуч ава-гваз алад,
Чун са-садал гьалтда мад,
Сагърай ви гуьгьуьл, зи цуьк.
КЬУЛАН ЙИФ ТИР ЭКЕЧIИРЛА ЗУН ХУЬРЯЙ
Кьулан йиф тир экъечIирла зун хуьряй,
ЦIвелин тарари кифер куьрснавай.
Абур-хару гьиссер авахьиз хурай,
Зи рикIин зурзунар -селлер хьанавай.
ЭвичIна дагьаррин, дуьзенрин винел,
Йифе вичин чIалал лайлай лугьузвай.
Эцигна вичин кьил дагъларин метел,
Верци са муьргуьди рекьер тухузвай.
Шагьварди туьмериз ян гузвай векьер
Чигерин мили тир хурал кьежизвай.
Зи кIвачик тIуш гана шупI жезвай векьер,
Накьвадкай галкIана хкаж хъижезвай.
КIурукIри кушкушиз тIула ван туна
Вилел ахвар алаз цуьк ахъайзавай.
Шуькьуьнтри чпин кIвал къуьнерал кьуна,
Зун физвай гелерай пар хьиз ялзавай.
Зун физвай...Йиф секин, са ван алачир...
Гуьгьуьлдал са мани хьанавай аруш.
Гьелени ахварай аватнавачир...
Зи рикIе экуьналд ксанвачир руш...
Кьулан йиф тир экъечIирла зун хуьряй,
Вацра шал вегьенвай вирерин винел.
Зи гьейрат куьнуь тир рехъ алатнавай,
Ксана амазмай цуькверин винел.
ГЬИНВА ВУН
(куьрелди)
Гьинва вун, рекьизва зун ялгъузвили,
Шадзавач зи гуьгьуьл цуьквери дигай.
Кузва зун, кузва зун кцIирдин гъилик,
Вучда за вун квачир и дуьнядикай.
Вун пир яни, эвлиян, вуч я чидач заз,
Зун диндал-имандал и ашкъди гъизва.
Вавай чара хьана жезвач завай физ,
Зун вавай къакъатиз валди хквезва.
Ахварриз къведа зун лацу хиял хьиз,
Акъвазна эверда верцидаказ ваз.
Галчукна, арушна за вун аял хьиз,
Вилерин нинедал хуьда, чидан ваз?
И кьве вил ацIурна ишеда зун вахъ,
И кьве пIуз ацIурна хъверда вахъ галаз.
Чинеба рекьивай айида вун гьакI,
И дуьня кьве патахъ пайда вахъ галаз.
Гьинва вун, рекьизва зун ялгъузвили,
Шадзавач зи гуьгьуьл цуьквери дигай.
Кузва зун, кузва зун кцIирдин гъилик,
Вучда за вун квачир и дуьнядикай.
КЪАНЖУКЬАР
Имни Къубадин шаир,
Я яд, я газ авачир.
Ацукьна къайи кIвале
Кхьизва чим квай шиир.
Гьеле физва алатиз
Адалай цIиргъ къетилрин.
Пакуд юкьвал кхьираг
Куьткуьнзава чукIулри.
Акатна квак Хандин юрд,
Бегдин яракь нуькердив.
Эл акатна кIвачерик
Каш чIугиз гьи тегьердив.
Са назирди барбатIиз
Хиналугъар, Дегьнеяр.
Дагъдин ксар килигиз:
-Гьикьван рагъул сегьне я!
Сада са сут дагъларин
маса гуз цIуд агъзурак.
Дагъдай кIватIай къанжукьар
Къачудай кас авачиз
ЦIудсавай руш ама гьакI.
Кардай чка уьруьш хьиз,
Къугъун я са гьар хана.
Депутатди базардал
Ахъайна къумархана.
Дагъдин хуруз тагъ чIугиз
Ава гьар юкъуз ламар.
Туьтер кьуна накъвари
Дагъдин гьамга булахар.
Къуба къайи уба я,
Аяздик квай гатузни.
Акьван мекьи жезва хьи,
Ава са-сад алугриз
Къубавийри Пакудин.
Имни Къубави шаир,
Я яд, я газ авачир.
Ацукьна къайи кIвале
Кхьизва чим квай шиир.
***
-Кас, ракIарал кутIуннавай,
КIарабни ччак гьикI я ваз?
РакIарин сив пис аквазвач,
Адлай а пад гьикI я ваз?
Ви ван кьунва чIугвамир дерт,
Кьуьзуь хьана агаж хьанва.
РакIаррилай ракIаррал вун
Гъавиз-гъавиз хкаж хьанва.
Масдакай на хабар кьадач,
Къвез-физвайди кицIи хьиз яхъ.
Кесибариз зунжур жакьукь,
Пулар гвайди медениз яхъ.
Ина вилиз такурд амач,
Ябудилай усал я рехъ.
КицIин йикъа авайбурун
Абурлу я са тIимил ччак.
Кас, ракIарал кутIун хьанвай,
Физва зун мад: ам вун, ам ччак,
Вилик гъавиз экъечIна вун,
Гъавиз-гъавиз амукьа гьакI.
Элкъуьрайди Римма Гьажимурадова я.