Са безам ба хьоца цхьан къавала:
Эцаш хьона к1ай коча, кортале,
Хьоца сай безам мелашха мала,
Дегар моцалца гуш хьа хозале.
Сарахьа, керда хоамашка хожаш,
Доладанна лела вай зонтаца?
Тишадар дийха со уллув воаг1аш,
Цун мода яр, д1айоалаш ханаца.
Цо со лоравеш, ара ха талхара,
Дагавувлаш хьоца цох-кхычох а,
Ваг1а со, кхуврчаг хьож, хьо елара,
Т1абулаш петар цхарг1ал кога а.
1а даар кийчадеш делкъа хана,
Киранден сала1арца дог тийша.
Г1айба хьалбузаш бедарах лайна,
Альбом юкъе картишкашка хьийжа.
Шортта д1алустийташ к1ада тайнаш,
Къаьна свитараи, тхана тайнашта.
Дошдоацачох хьоца, ц1ана бегбеш,
Ешаш поэти байташ байзарашта.
Догада хулаш берий ловзараш,
Вайх хул боккхий нах, дагабовла ба.
Хьоца къавалар сона дар, дезаш,
Тешалахь, цхьан къадалар ираз да!
Из х1амсар уйла яр вай кара,
1а хьалахалахь, хьайна со эшаш!
Наха юкъе со хул хьона тара,
1а хьалахалахь цига со везаш!
Т1аккха кхетаргья хьо со везара,
Мел тара да вай войла безама,
Гучдоал вай, ца хилча ца мегара,
Вай цхьан цахилча далац даима.
Мустафа Ганижев 11. 11. 2017 г.