Мархаралла ч1агъандин ван. Гуьлуьшан гатфар!
Гар алатна, мадни кьакьан хъхьанва цавар.
Мах ят1а им, ахвар ят1а хквезвай рик1ел:
Цлахърин хуьр, ви мектебда авунай за к1ел.
"Къафар маалим" ширин авур заз Пушкинан ч1ал,
Дяве акур Гьасанбегни Ибрагьиман к1вал.
Къуншидин свас, чубандин паб, рик1еллама зи -
К1елен к1уфуз п1агьар гудай рик1 михьи Эрзи.
Хесет михьи, ибрет михьи, гунагь заз тахьуй,
Барабар тир вилийриз а инсанвилин суй.
Тир жеди зун ви рик1 алай аялрикай сад -
Нини хьтин ч1агай бала, къиметарни "вад".
Ви демера зи бубади, жегьил ва туькме,
"Аваркавха" кьуьл ийидай ц1уруриз чекме.
Вахъ вил гала, Цлахърин хуьр - аялвилин гин,
Муьгьлетарни мукьвал жезва, рик1икни ква кин.
Булахдин цел паркьулдин пеш - к1усни квач юзун.
Мархар тала! Шагьвар хьана хквен, белки, зун.