Берекатдин атирлу ял,
Вуч багьа я, чан диде зи.
Хьран къвалав, къари кьуьзуь,
Патавни жен гъвеч1и аял.
Гьатнайт1ани, гъилера т1ал,
Сивел михьи са хъвер алаз.
Явашдиз ц1ун мецяй акьаз,
Чрадай фу, туьк1уьрна къвал.
Рик1яй зи гьак1 физва хиял,
Недай хьи за ширин фу чи,
Ниси хпен, къвалаг вичин,
Нез гьабурни, ядай за ял.
Ак1урдай за фуада кьал.
Нихиш ч1угаз жедай чина.
Чими фуни вирда т1уьна,
Вахар вири, к1ват1 жедай зал.
Суьгьбетрин лап жедай к1ват1ал,
Гьардал вичин нубат къведай.
Вахтар фена, квахьна гила.
Ацахьнава, амач ан к1вал.
Авахьзава накъвад ст1ал,
Я фу чрар, касни амач.
Гьич саникни я рик1 кумач.
Лап зи чанда гьатзава т1ал.