Акъваз, яб це заз, такабурлуди,
Вун билбил жемир чигеривай тух.
Ваъ, гьазур туш зун зак1ал галудиз
Шуьк1уь туп1ухъай, на гана буйругъ.
...Живедал, рагъ гуз, акъвазнава ам,
Кавалда, к1аз хьиз, гьахьнавай къужа.
Умун вилерив я хъвер гвач, я гъам,
Машгъулнава ам са гъвеч1и руша.
Бирдан, агь, и март! - тади квай, агъур
Ст1ал аватна кьуьзуьдан къуьнел.
Кхунна къужа. Ст1алар агъзур,
Гатфарин марфар, зулун гур хуьлер
Чизвачни адаз ц1уь-цуру акур?
Амма тек ст1ал мартди багъишай,
Лацу чурудик хъвер кутур нурлу,
Бажарагълу я: гуьзел танишар
Хкана рик1ел, жегьилвал гурлу...
Вун билбил жемир чигеривай тух,
Куьлуь дердийри шиткида ви хъвер.
Зун са ст1ал я, тушт1ани артух,
Мани гвай майрин, алатай, хквер.