ЧУБАРУК
"Гатфар!"-лугьуз чи ракарар гатайла,
ЧIив-чIивдин ван чи айванра гьатайла,
Шад жеда рикI, вун хтай чIал кьатIайла,
Чан чубарук, вун хтана рагъ атуй!
Хтанва вун яргъал рекьер атIана,
КIуфал мани алазва ви датIана,
Чи чIерейрик муг араса, кутIана,
Чан чубарук, вун хтана, рагъ атуй!
На вуч тIуьна яргъал, къариб чилерлай,
ГьикI хъвана яд а чилерин хуьлерлай?
ГьикI хтана вацIарилай, гьуьлерлай,
Чан чубарук, вун хтана, рагъ атуй!
ГьикI тир гьалар вун алукьай чкайрин,
Лув ганани на винелай чкIайрин,
ХарапIнавай женгерини, ккIайри?
Чан чубарук, вун хтана, рагъ атуй,
Вун чи патаз кIан я даим сагъ хтуй!
27.04.2018.