Вун завай яргъава … акъатзава рикI,-
Канда заз патав хьун - дердериз шерик!
Ша фин чун, каниди, кьуна гъил-гъиле,
Акъатин чи патахъ, лап Шагьдин кьилел.
Рехъди вун рахух заз, канивиликай,
Гьижрандин азабрин къайивиликай,
Рахух къастарикай , саф ниятрикай,
Чи рикIер галкIурай хуш сятрикай.
Фикирар тефирай залум йиферал,
Вегьида за цукьвер а ви киферал!
Галатдач чун садни - физватIани ях,
ТуькIуьрин хиялра ашкъидикай мах.
Вун хьухь чи дагъдин вацI - зунни чIехи кьвал,
Акъвазда ви вилик лап юкьни юкьвал,
Кьакьан кукIушрилай тIем -къуват къачуз,
Дили йигинвилив гьахьа зи хуруз!
КандатIа, хьурай вун хару мулдин цуьк,
Зун -са дили мазан,акатнавай цIук,
Каруди, за милиз эцигна вал чин
Жуван нефесдив ваз акъудда ифин!
Белки вун гъвергъвер я -гатфарин лишан,
Живедин кIаникай кьил хкажнавай?
За, ракъинин нур хьиз,эцигда вал чан,
Перишан йикъариз,цав акажнавай.
Эхирда, легьзеда, элкъвен лекьериз,
Акьахин кьакьанриз, лув гун - кьуьлериз,
Килигиз канивал авай вилериз
Эвич1ин чилерал,мах давам хъийиз….
Цукьверин арада вегьин лезги рух,
Вун мад ашкъидикай рахух, заз рахух,
Лагь рикIин гафар на, мискьивалмир, лагь,
Вакай тух жедач зун ,тух жедач, валлагь!