И чилел бахт хьанач санал жедай чаз,
Гьалтна гьикI сад-садал уьмуьрдин зулуз,
Чин-чинал ала гьа умудар кутаз,
Дердерин харалар шутанна кулуз.
Океандин юкьвал луьткве я зун са,
Гару куьмекзамач -кукIварна елкен…
Гьа икI акьалтIда жал ашкъидин кьиса,
Ава тек теселли –захъ гала ви хъен…
Заз канда хушбахтвал, эвелдай жедай,
Садни юкьваравай гьиссерин юзун,
Кандач заз зи кьилив эхирдай къведай
Хажалат -гъам галай йикъарин жузун.
Бес руьгь вун акурла вучиз жезва шад,
«Яр» лугьузватIани вуна масадаз?
Белки а дуьняда вун ахквадач мад,-
Яман рекьиникай кичIе хьанва заз...