Жагал алфавитлизир
Лер х1урпри къяяназир
Агь! сен жагатил илди
Даргала к1ирка х1урпри.
Дахъ жагали дикьургу
Дарган х1урпрала дугьби.
Ах1ерли дирахъенгу
Сарну нешла мез илди.
Нуша дишт1ах1ейчирад
Кархьи дурсри школалар
Нешла мез хъумх1ертахъес
Бац-берх1иван дигахъес
Бури нушази: Илди
Арц-мургьиван дурхъати ,
Чус жан ах1ерх1ейрути
Лебти саби г1ялимти.
Вари, хъуммартидая
Нешла мез дигх1ейгути
Биъх1ебиур мурадли
Давла – мас лебли хьалли.
Вари, х1урматбирена
Неш – дудешван дурхъати,
Урк1илизир делк1унти
Нешла сарину илди.
Тяп школализир набван
Дирулра дурсри нуни.
Буч1антас даргала мез
Хъумх1ертахъес рузули.
Гьанна нуни бурулра
Буч1ахъути дурх1нази:
Дурх1ни мез дигахъена
Нешла сарину илди.
Нешла мез х1евзахъути
Ятимтигъунти саби.
Бараягу урк1ец1и
Шиличи ва бег1тачи.
Г1ярус мез х1евзахъули
«Мама», «Папа» х1ейк1ули
Хъуммартидая х1ушаб
Даргала мез дурхъати.
Агь! х1ябилра бахъбааб
Иш дунъяла г1ялимти,
Дарган дев ахъбуцибти,
Илди мез г1ердурцути.