Гъилихъ галай туп1алдин къаш
Нур чк1ана авахьзава.
Вун такваз рик1, яваш-яваш,
Зи чандавай акъатзава.
Цуьквер алай лацу перем,
Михиникай гьак1 куьрснава.
Муьгьуьббатдин Эсли, Керем,
Шумуд йисар лап киснава.
Йикъан, йифен ахвар амач,
Накъварикай вирер хьанва.
Дак1ардаллай цуьквер амач –
Пешер алай хилер ханва.
Нураривди вегьей хилер,
Ракъин(ин) къизил - гимишдава.
И дуьньядин рик1ин хирер,
Шумуд тарцин емишдава?
Гару гъайи гьава серин,
Ви вилера ишигъ гьатна.
Келегъа кьур ви чан ширин,
Дере-тепе талгьуз гьатна.
Гила вучда, лагь вуна заз;
Гьуьрмет течир, вучда вакай?
Чинеба гьак1 кхьиз кагъаз,
Халкьдин вилик, катиз захъай.
Гьич садрани къалурдач ваз,
Гьикьван рик1из т1арнат1а зи.
Экуь дуьнья, билбил рахаз,
Акъудзава рик1яй иви.
Шиир кхьир уст1ар туш зун,
Гафар я зи рик1яй къвезвай.
Акl жемир хьи, дуьньяда вун
Тахсир квачиз гьак1 экъвезва.
Ахъа, михьи, чими рик1из,
Гьа рик1 тирвал дуьнья гуда.
Пехил касди рекьиз-рекьиз,
Алакьайтlа вун цlа куда.