Вуч я кIанивал
КIевера гьатнавай фагьум акIана,
МефтIеда къай авай гъамар ацIана,
Са юкъуз бейхабар тадиз атана
Руьхъедик акатай цIай я кIанивал.
Гуьлуьшан яйлахар къвезва зи рикIел,
Марварар акъатна цацарин никел,
Шадвал ава руьгьда гьиссерихъ цIигел-
ХъуьтIуьз гатфарин цуьк - май я кIанивал.
ТIалар гуда чандиз чаравили гикI,
Вун къекъвез жеда гьа жуван паюник,
Ам патав тахьайла акъатдачни рикI,
Саврухдин ,тIурфандин къай я кIанивал.
Фергьад мажбурначни дагълар чукIуриз,
Алахъиз Ширинан гьиссер юзуриз,
Межнун чуьлда хьана Лейли жагъуриз,
Эслидин Керемаз «гьай» я кIанивал.
Экуь я зи мурад, экуь я ният,
Хиялди авайди –нур гузвай тават!
Са чандин къенева са чан аманат-
Кьисметди заз ганвай пай я кIанивал!
© Copyright:
Билал Адилов, 2018
Свидетельство о публикации №118121005302