ЧIехи жез кIандай фад аял чIавара,
Садра рекьиникай хиял тавуна,
Къуватар гьакI серфдай хьана авара,
Алатдай кIвалахар рикIе гел туна…
Амма чун алахъда чехи хьайила
Жагъуриз кукIушар рекьер атIана.
Са чIавуз кьисметди вири гайила
Мад вилик физ канда, рази тахьана…
Уьмуьр легьзеяр я, женгера физвай-
Сада шадвал гузва, муькуьда гъамар,
Герек чIав алудин хажалат гъизвай,
Вегьин верцивилик йигиндиз камар…
КьатIузва гьакъикъат жердавай яшар,
Бахтунин паюнив гьикьван гуматIа?
Агудун паталди вилик квай крар,
Яраб гила чандик къуват куматIа?
КичIедач кьиникай, атана ажал,
Дерт жеда заз са кар, – амач захъ сабур, -
Танда чан амай кьван тахьана мажал,
Кьилиз акъат тавун рикIе амайбур…