Мад тема амачни гьикьван кхьида,
Бес тушни теснифун ашкъидикай на? -
Къе чинлай атIана лагьана сада…
Амма заз лап адан язух атана!
КIанивал уьмуьрдин мана тушни, лагь,
Бегьер хкатдани яван чиликай?
Ашкъи са кукIуш я –руьгьерин пачагь-
Вун амма рахазва заз лукIвиликай!
Вучда а рикIикай гьиссер авачир,
Кьуранвай кам хьтин умуд атIана?
Яраб кIанибурун вуч ятIа тахсир,
ЧIух хьана аламай кьисметди кана?
Бахтавар инсан я гъил гайилахъди
АватIа са кас ваз кьадай гъиликай ,
Са кIвач сурун къене лап хьайилахъди,
Кхьида за мадни кIанивиликай!