Накъвар

   

Къе  мадни ам  шехьна,  сагърай лагьана,
Акуна а накъвар,пад хьана зи рикI…
Дуьня элкъвена заз мичIи сур хьана,-
Дердер пайиз кандай –жагъанач шерик…
 
Саки гатун марф тир  нагагь акатай,
Гугрумна ацIурдай дереяр, камар,
Цифер къакъатдай  хьиз нурар агатай,
ЧукIуриз алахъна  чандавай гъамар…
 
Белкини  зайифвал туш  вилин накъвар,
Белки хъенар ятIа  абур са рикIин?
Накъвар чара алем - са дили авхар,
Са капIал суалар- за  вучин, гьикIин?
 
Чилни цав сад хьана-  акатна зурзун-
Саки авахьзавай  канивилин цIай…
Накъвар  секин лепе,  накъвар лал рахун,-
Деринра акIанвай  руьгьерин  гьарай …
 
Лагьана эхирдай : вуна хуьх сабур,
СтIалар михьда за ваз азаб  гъизвай!
Азизди, каниди,  накъвар туш абур,
Гьижрандин тIалар  я, авахьиз физвай…