Тахсир вуч ятIа?

   
Акуна мадни вун сенфиз ахварай,
Азизди, чун авай дагъдин ценера,
Пагь, гьикI  алахьзавай   къушарин гьарай,
Ракъин нур гьатнавай хайи хинера.

Гьикьван иер жеда чи патан векьер-
ШупIиз гьайиф къвезвай чаз къекъведайла!
Цаварай шаддаказ хъуьрезвай лекьер,
Вун кIанивиливди  захъ элкъведайла.
 
Ашукь хьиз  са  чуьнгьур  эцигна хурал,
Шиирар лугьузвай вуна зун патал,
Чун гьикьван  азад тир  гуьлуьшан чIурал,
КIунчIар хразвай за бурма  киферал.
 
Цаварин ранг алай мулдин цукьверал,
Экуьнен чиг алай ви накъвар хьтин…
Гьейран  яз ашкъидин канвай  экверал               
КIанзавай чаз кьведаз аршдиз акъатин!

Кьвалари  дагъдин вацI  тунвай гуьнгина,
Рагарин тиквили гьайбат гузвай са,
Акьул руьгьдихъ галаз авай женгина,
КьатIуз кIанзавачир чандавай суза…
 
Уьмуьр алатзава йисари кьид гуз,
Ама чун  арада цавунни чилин,
Гьиссер чав икьван геж  агакьна  лугьуз
Тахсирар  вуч ятIа и кIанивилин?!

                Б.А.   02.11.2018.