Са югъ фад алатда,- лагьанай вуна,
Са тIимил шад хьухь вун, азабар туна,
Амма хиял вав гва, вилерни рекьел-
Мадни акъатайди зи рикI хьана къе.
Накь авур ихтилат хквезва рикIел,
А верци гафарихъ жедачни цIигел?!
Вучиз атанайтIа вилерал накъвар,
Экуьнлай марвардал чигедиз ухшар!
Гьисна зи къеневай гъамарин ванер,
Бахтунин балкIандин ялнавай кьенер,
Хъуьрез алахънай вун, чуьнуьхуьн патал,
Амма сир ахъайна, эхиз хьанач тIал…
Эхь, вунни гьа зун хьиз ава женгина,
Экуьнлай зи руьгь вахъ къекъвезва ина,
Дустарин арада ятIани заз хуш,
Вун авач… са югъни уьмуьрдикай туш…