Дада деъна, кІваин хури…
Лизи ургмикк жин шула гъул,
Зав`инра ал диф-гъаравул.
Кархьри айиганси хядар,
Хябяхъдихьна кархьра унчІвар.
ЦІиинра убхьура гъазан,
Суфрайихъ уч шула хизан.
А цалик сяаьт либхури,
Дада деъна, кІваин хури
Ляхнар ккудрукІру вахтар чан:
Чухра, келеф, дуркьар рукьан…
Хиларра а духьну зяиф…
ЦІийи заманайиъ, гьяйиф
Ккиришлар-симарин мукьмар
Гъулаъра ерхьури имдар.
Аьхю шула кесп кадарди
Улихьганси дарди шубар.