Ккунийзуз вагъундин ерина фургъун

   

Тахъ-тахъ, тахъ-тахъ…жабгъура гьялак вагъун,
Хъана узу дагъларизди гъахури,
Ккунийзуз вагъундин ерина фургъун,
Дийигъуз, уткан йишвариз лигури.

Гъузуз душвариъра юкIвра дябхъяйиз,
Гъяркъю шиклар кIваъ зигури ккунибкьан.
ЧIатишв, чрушин, укIар-кIажар дустар йиз,
Сакитвал табиаьтдин-дарманра кIван...

Рукар-кюлерин вишришнахъ хъпехъруган,
Герекра шулдарзуз я жара мукьмар…
Зав` ан хядарра узухъди аьлхъруган,
Наънан вуш арайизра гъюру шиърар.